juli 13, 2019
fan ûnbekend*
Demeter, Zeus syn suster,
wenne by him op Olympos,
wie goadinne fan it nôt,
dat siedde waard oer hiel de wrâld,
wat kaam de folken goed fan pas.
Demeter, Zeus syn selskips-
dame, skonk him Persephone,
dy’t ûntfierd waard – net as breid –
troch Hades, tastimd hie har heit,
foar mem te pynlik, ’t wie te kru.
Demeter socht wol njoggen
dagen, reizge nei Eleusis,
’t hert waard har as balling kâld;
de ierde skonk net mear it nôt,
gjin folk wie fan ’t bestean noch wis.
Demeter seach har dochter
’t heale jier, lykas god Hades,
’t kaam sa ta in kompromis;
de wrâld wie fan it nôt wer wis:
yn twa seizoenen snijt it mes.
Byld ‘Demeter’
juli 12, 2019
fan ûnbekend*
Fan Paulus, troch de wil fan God
apostel fan ús Jezus Kristus,
oan jim dy’t leauwe, folk
fan God genede en ek frede,
yn syn hannen is ús lot.
Us lot komt streekrjocht út syn plan
mei Jezus Kristus, de ferlosser
fan elkenien dy’t leaut,
it plan om troch him gear te foegjen,
dêr sprekt syn genede fan.
No ha ik fan jim leauwen heard
en ek dat jim fan minsken hâlde
dy’t hearre by Gods folk,
ik hâld net op om tank te bringen
foar jim stribjen op dit mêd.
Oan Kristus joech God krêft en macht,
Hy sit yn himelske kontreien
heech boppe ierdsk bewâld;
de tsjerke is syn lichem wurden,
Hy is ’t haad en hâldt de wacht.
* Mozayk ‘Paulus’