augustus 5, 2019
fan ûnbekend*
fan ûnbekend**
Sy wie fan goed komôf
en ryk troch har ideeën
foar berntsjes yn de nederklits,
’t idee fan mosk ta grutske pau.
Dokter wie foar har ’t berop
om minsken hiel te meitsjen,
ek foar de geast waard sy in gids,
’t idee fan ûnder nei de top.
Minsken wiene mear as brein,
it gie om alle sinnen
fan ’t bern, mei spul as stimulâns,
’t idee fan boartsje nei de ein.
Montessori en de wrâld,
sy reizge oeral hinne
mei as bestimming ’t swakke bern,
’t idee fan rypje mannichfâld.
Unrjocht koe sy mar min oer,
alhiel net oer tirannen,
sy liet har stânpunt dúdlik sjen,
’t idee fan sjenners oan it roer.
Montessori mear as frou,
in rykdom oan ideeën
joech útsjoch en de bern de kâns
om fan in mosk te wurden pau.
* Foto ‘Maria Montessori’
** Foto ‘Maria Montessori tusken bern’
augustus 4, 2019
It paad rûn oer de bûlevaar
op sneintemoarn , de twadde dei
fan Snits syn heechtiidswike;
boaten leine board oan board
te wachtsjen op har waar.
It wie noch stil yn wyt-read-blau,
wat alles fan de nachtdronk sei,
it feest woe mar net wike
foar it ronkjen ûnder seil,
dat heinde al de dau.
De pankoekspanne heinde ’t aai,
dat op it fjoer te bakken lei,
want nei de drank, die bliken,
seagen se yn ’t nachtmiel heil…
moarn is der wer in dei.
Hjoed sille se it wetter op,
it read-wyt-blau nimt harren mei
nei hieltyd nije piken,
flessen geane mei oan board,
sa ha se ’t yn de kop.