juli 21, 2019
fan ûnbekend*
Kin in swarte skriuwer wêze,
dichter, konsul, advokaat?
It is de fraach, net fan in blanke
mei it oardiel al paraat,
it antwurd is yn ’t hert te lêzen.
James syn mem mocht der wol wêze,
song har soan de wierheid foar:
foar swarten wankten kleare kimen,
dus: ‘Sjong mei elkoar yn ’t koar
dat opkomt foar wa’t noch net lêze.’
James syn stim hat fierder klonken
as yn stegen muorreswart,
syn liet wie ek op wyt te rymjen:
Broadway die him net tekoart,
’t fjoer lôge op út songen fonken.
Roosevelt fong op de klanken,
stjoerde James as konsul út,
in swarte dy’t it libben kleure
mei syn jeften, ta beslút
seach hy de kleare kimen wanken…
… foar syn folk nei ’t minder wêzen,
yn de striid dêr boppe-út,
op ’t lêst lykweardich oan de blanken.
* Foto ‘James Weldon Johnson’
juli 20, 2019
fan ûnbekend*
God hat fan ivichheid al ôf
in prachtich plan hân mei de skepping,
in plan dat lang ferburgen bleau,
sûnt koart ha ’k ûnderfûn syn trou.
Gods plan kaam op myn kromme wei,
want Kristus hat it iepenbierre:
syn leafde dy’t my nei jim dreau,
foar jim perfoarst in ommeswaai.
In heiden kin ek mei op ’t paad
fan Kristus om nei God te reizgjen,
want sljochte is de djippe kleau,
elk hat by Kristus’ rykdom baat.
Ik mocht as allerminste fan
de hilligen jim ’t boadskip bringe,
dêr’t ik mei hert en siel yn leau,
net mear ferburgen is Gods plan.
* Yllustraasje ‘Gryksk wurd foar goddeleazen
yn de brief oan de Efeziërs’