september 6, 2019
fan Peter Paul Rubens*
’t Pear gie as Dioskouren troch de tiid
en hie de haadgod Zeus as heit,
de twaling Kastor-Polydeukes,
foar Sparta joegen se har yn de striid.
De striid gie tsjin Atene, want ûntfierd
wie sus Helena, dus moast sy
werom troch Kastor-Polydeukes,
it hat de broers as hechte ienheid sierd.
As ruters gie de twaling ek op jacht
nei ’t reuzeswyn fan Kalydon,
mar net troch Kastor-Polydeukes
beswike ’t swyn, ’t wie justjes ûnferwacht.
Tsjin twaling-neven gie in fammestriid,
dy froulju waarden ek ûntfierd,
doe wol troch Kastor-Polydeukes,
broer Kastor rekke dea, it wie syn tiid.
Unstjerlik libje of it deaderyk?
Heit Zeus liet ta in kompromis:
‘Om beurten, Kastor-Polydeukes!’
Sa kaam de stân foar beide wer gelyk.
* Peter Paul Rubens (1577-1640)
Skilderij ‘Untfiering fan de Leukippiden’
september 5, 2019
fan Ivan Shishkin*
De stilte rûzet tusken stammen
op Valaam, in eilân yn de mar,
ek eilân yn it lânskip fan de Rus,
gjin fjoer is hjir ûntflamme.
Allinnich fjoer fan ynspiraasje
as de keunstner nimt dit gea foar kar;
de ranke stammen komme op it doek,
út rûgens riist de graasje.
In kreakjen brekt troch alles hinne,
’t stille rûzjen rekket yn de war,
de bjirkestammen krije skok nei skok,
it skot komt nei it rinnen.
De keunstner moetet dêr de jager,
tusken harren is ferskil yn kar;
as stamke komt de jager ek op ’t doek,
Valaam wurdt traach, noch trager…
…oant it hiele lânskip stiet deastil
en ûnder ’t byld stiet keunstners namme.
* Ivan Shishkin (1832-1898)
Skilderij ‘Lânskip mei jager. Eilân Valaam’