augustus 22, 2019
fan Nikolay Yefimov*
Hoefolle bylden oft er opslein hat
fan jongs ôf oan oant hjoed de dei,
hy kin it net fertelle;
mei ’t ynwindich each sjocht hy dêrnei,
hy hat in pear nei boppen helle.
De hannen fielden oan it skerpste byld
en glieden oer it blanke blok,
it ark kaam yn beweging,
mes en beitel hiene ’t fleanend drok
en joegen ’t byldsje syn ferheging.
Twa binnenbylden rûnen trochinoar,
sadat it bist net stevich stie,
mar hy kin wol fertelle
dat it heger wol, it jout him rie
om eigen bylden by te stellen.
* Nikolay Yefimov (1838-1891)
Skilderij ‘Alde houtsnijer’
augustus 21, 2019
fan ûnbekend*
Kolossers, lit my dit ek skriuwe:
hoewol’t jim my net kenne fan gesicht,
myn geast is wol yn jim fermidden,
dat dy wit fan leauwe as in plicht.
De plicht skriuwt foar: hâld jim oan wetten,
want wat de wet seit, moat de minske dwaan,
men is dan bûn oan tûzen triedden,
hat gjin frije hannen om te jaan.
Guon skreauwen foar: ferearje ingels,
want wat in ingel docht, is tusken God
en minsken yn te stean en bidde
foar it heil, dat ivich wurdt ús lot.
Mar ik skriuw foar: ferearje Kristus,
want mei syn bannen hâldt Hy by elkoar
wat los wie, oars as tûzen triedden…
’k hâld as learaar jim dy wiisheid foar.
* Ikoan ‘Paulus’