september 9, 2019
In stipke achter op it wetter
tusken beide wolken yn,
dy fan de himel en de poel,
wjerspegeling fan boppen…
wat hat dy stip foar doel?
Hy is gehiel opnommen,
libbet tusken fisk en wyn
op grize wjukken en ’t gefoel,
wjerspegeling fan boppen…
in ingel op ’e poel?
Sjedêr de hearsker oer it wetter,
heech op poaten, wat is syn
ferhaal oer wat er sa al kin?
Wjerspegeling fan boppen:
‘Sjoch hoe’t ik dûbel bin!’
september 8, 2019
fan ûnbekend*
fan ûnbekend**
Syn begjin lei heech yn Denemarken,
Willem wie syn namme, twadde prins,
in lytse kâns mar op ’e troan,
sa wie no ienkear de tradysje…
oant de Gryk ferlei de grins.
Willem hat nei de Hellenen harke,
waard noch foar syn tweintichste har foarst
en reizge fjouwer jier troch ’t lân,
sa learde George*** syn minsken kennen,
hat har fan ’t ferlies ferlost.
Altyd minder as de Ottomanen
fielden Griken har al iuwenlang
as wie har eigen skiednis stoarn,
mar ûnder George kriich it ferlerne
wer in kâns, de Turk waard bang.
Stêden kamen ûnder Grykske fanen,
wapperjend foar George, de kening dy’t
regearre hie mei sûn ferstân;
syn ein lei bûten de tradysje:
moard troch immen sûnder spyt.
* Foto ‘Jonge kening George I’
** Foto ‘Alde kening Geoerge I’
*** Prins Willem waard kening George