september 14, 2019
fan Rembrandt*
Wer stjoer ik jim in skriuwen,
want nei myn earste brief ha ’k heard
dat minsken op ’e doele reitsje
fan waanideeën yn de stêd.
Ik wit fan jim benearings,
it leed dat de gemeente trof,
mar bleaun is alle moed en leauwe,
jim sjonge altyd noch Godlof.
Der sil ferromming komme
as Jezus Kristus wer ferskynt,
dan sil Hy foar it Godsfolk pleitsje
dat yn it leauwe frede fynt.
Mar wa’t om God net jouwe,
dy wurde mei syn straf ferslein;
om’t sy yn ’t kweade hingjen bleauwen,
wurdt frede har foargoed ûntsein.
* Rembrandt (1606-1669)
Skilderij ‘Paulus’
september 13, 2019
fan Lourens Alma-Tadema*
Kin men fan in jonkje sizze
dat syn libben goed of min ferrint?
Sjedêr de lytse Elagabal,
gau al hegepryster fan El-Gabal…
koe hy foar dy god de tsjinst wol risse?
Kin in puber keizer wurde?
Rome hat him yn dy kar fersind,
sjedêr de jonge Elagabal,
by syn yntocht dekadint as Babel…
foar El-Gabal fierste wyld foar wurden.
Kin in keizer dûbel trouwe,
mei in kreaze frou en flinke fint?
Sjedêr biseksuele Elagabal;
yn de roazen liet er lju fersûpe…
Rome koe syn keizer net fertrouwe.
Kin sa’n keizer libjen bliuwe?
Moardners hawwe harren net fersind,
sjedêr de deade Elagabal,
foar sa’n keizer sil gjinien mear krûpe…
Rome seach him yn de Tiber driuwen.
* Lourens Alma-Tadema (1836-1912)
Skilderij ‘De roazen fan Heliogabalus (Elagabal)