oktober 17, 2019
fan Cornelis Bisschop*
Sjoch hoe’t ik dit gerdyn optil
om jim in oar doek sjen te litten,
dat my oansprekt om it byldferhaal,
ik lit dêrmei myn eigen witte.
Sjoch Ganymedes, soan fan Tros,
Trojaanske kening, dy’t syn soantsje
hoedzje lit syn hiele keppel skiep,
dy hâlde fan dat kreaze mantsje.
Sjoch Jupiter syn eachopslach,
dy krijt de hoeder yn de gaten;
wylst de keppel lûd de needrop jout,
wit Jupiter him te bepraten.
Sjedêr Olympus, op ’e top
moat Ganymedes wyn ynskinke
foar de goaden, ek foar Jupiter,
dy’t hy betsjinnet op syn winken.
Sjoch hoe’t ik myn gemoed optil:
ferlern ha ik myn leaf lyts soantsje,
’k slaan myn eagen op en sjoch syn stjer,
dêryn werken ik ’t kreaze mantsje.
* Cornelis Bisschop (1630-1674)
Skilderij ‘Selsportret’
oktober 16, 2019
fan ûnbekend*
Lit my oer de riken dit noch sizze:
driigjend is foar har ’t gefaar
om yn de strûp fan ’t jild te reitsjen,
lit har jaan om net it heil te missen.
Lit de slaven fan de riken tsjinje
sa’t it past, har hear de ear,
it sil ús mienskip riker meitsje,
elkenien sil sa it heil fertsjinje.
Timoteüs, dit wol ’k noch sizze:
war dy yn de goede striid
en stribje nei it wiere leauwe,
’t ivich libben silsto dan net misse.
Plafondskildering op hout
‘Oerwinningskrânse nei de goede striid’
yn de Saint-Michel kapel te Douarnenez