oktober 19, 2019
fan Rembrandt*
Op ’e nij in brief, myn leave jonge,
de twadde dy’t ik oan dy stjoer,
diskear yn finzenskip út Rome wei,
my tinkt it lijen is gau oer.
Net dat ik my foar it lijen skamje,
ik hâld betrouwen yn de Hear
en wachtsje rêstich op ’e grutte dei,
wylst ik de drege tiid fernear.
Lit it fjoer fan Gods genede brâne,
syn Geast jout krêft om dat te dwaan,
al stiet dyn libben troch ’t bliid boadskip faai,
do silst it oan de harkers jaan.
Lit de bylden foar harsels mar sprekke:
fan Kristus bist in goed soldaat,
nim foar in priis de regels wol yn acht,
de boer hat fan syn wurkjen baat.
As wy mei Jezus Kristus stjerre,
dan libje wy tenei mei Him
as keningen, want Hy bliuwt ivich trou,
ek as negearje wy syn stim.
* Rembrandt (1606-1669)
Skilderij ‘Paulus skriuwt brieven yn de finzenis’
oktober 18, 2019
fan Isaac Walraven*
Epameinondas
yn Thebe adviseur en generaal,
ek musikus en dûnser,
heech wurdearre waarden syn talinten,
fan dea nei dea wie syn ferhaal.
Epameinondas:
fan adviseur nei heechste generaal
yn fûl gefjocht tsjin Sparta,
grut oerwinner troch de striid yn pearen:
twa maten mei deselde taal.
Epameinondas
werom yn Thebe, mar wol út ’e geunst,
gjin sege koe him rêde
fan de deastraf, dochs soe ’t needlot keare,
want heech wurdearre waard syn keunst.
Epameinondas
waard yn de twadde striid wer generaal
en op ’e nij tsjin Sparta,
wer oerwinner, mar wol swier ferwûne,
dat wie de ein fan syn ferhaal.
* Isaac Walraven (1686-1765)
Skilderij ‘De dea fan Epameinondas’