september 28, 2019
fan ûnbekend*
Oan Timoteüs, myn soan yn ’t leauwe,
fan Jezus Kristus’ boadskip wis;
fan Paulus, roppen troch de Hear,
dêrfoar hie hy it mis.
Wreed ha ik de kristenen ferfolge,
mar Kristus is oan my ferskynd,
dêrnei wie ’k foar syn boadskip klear,
wat men dêr ek fan fynt.
Witst, Timoteüs, dat ik dy frege:
‘Wolst langer bliuwe yn de stêd
om tsjin te gean de falske lear,
dy’t faaks it oars wol rêdt.’
It binne learaars dy’t de wetten
ferkundigje op har manier,
se snappe ’t sels net, jouwe kear
op kear har wurd foar wier.
Dus, Timoteüs, ferbied har fabels,
do witst wol, it is praat-fan-neat,
wy binne mei dat boadskip klear,
it is ta leechte keard.
* Ikoan ‘Timoteüs’
september 27, 2019
fan ûnbekend*
Elektra, Agamemnons dochter,
dy’t ferlear troch moard har heit,
fermoarde troch har mem en minner,
akseptearre sy dy dea as feit?
Elektra, suster fan Orestes,
wachte op har lilke broer
om wraak te nimmen, sa te winnen
’t pleit, dan wiene dy gefoelens oer.
De mem en minner waarden deade,
huningswiet preau harren wraak;
gefoelens kinne har fersinne,
’t moardzjen seach Elektra doe as taak.
Elektra, Agamemnons dochter,
preau by elke moard syn bloed,
har eigen kolke om te winnen…
brocht de dochter sa har heit de groet?
* Byld ‘Orestes en Elektra’