oktober 21, 2019
Nei elke stap in stoel
om efkes út te rêsten
nei’t de heksen dûnse ha
mei podden dy’t de fuotstap folgen.
De podden wiene om
yn tsjettels út te koaitsjen:
mei it sop op tsjoenen ta,
wa’t dronk, waard troch it sop ferswolge.
Sa waarden podden mei
de drinkers ta in ienheid,
dy’t ta libben kaam op grûn
fan wat de heksen hawwe woene.
In rûnte byinoar,
wat lytser en behearskber,
dat it feest in plakje fûn
dêr’t heksen om de podden rûnen.
oktober 20, 2019
fan Max Unger*
As Noarman mei in flymskerp swurd
woe keizer Wilhelm wol de wrâld oergean
om kusten te befarren,
dêr’t it goud fan fierren blonk,
hy seach himsels al striidber stean.
In byld riist boppe mannich wurd,
de keunstner gie oan ’t wurk op keizers wink
en hat himsels net sparre;
Frithjof, dy’t fan fierren blonk,
wie foar de Noaren in geskink.
Held Wilhelm Frithjof gie de wrâld
oer as de keizer fan de Grutte Kriich:
de earste foar de twadde,
doe’t de stim fan Adolf klonk,
in Frithjof mei flymskerp geliich.
* Max Unger (byld makke yn 1913)
Byld ‘Frithjof’