november 1, 2019
fan William Adolphe Bouguereau*
Soargjend foar in sterk ferlet
fan iten, drinken, sliepen, frijen,
fleach hy fan de iene nei de oar
mei pylk-en-bôge om te treffen,
dêr wie Eros ier en letter foar.
Aphrodite wie syn mem,
goadinne fan de frije leafde,
liet him witte wêr’t er hinne moast
om mei de pylken doel te treffen:
’t hert, dus mikte Eros op it boarst.
Pylken mei in gouden punt,
dy soargen foar in djipgeand frijen,
hie in pylk lykwols in punt fan lead
sa’t Daphne trof, sy soe beseffe
dat it rekke op ’e kop ferkeard.
Psyche trof in gouden punt
en koe it lok net op, de leafde
kaam fan Eros, dy’t sels troffen waard
troch Psyches skientme, mei har houlik
hiene beide by de leafde baat.
* William Adolphe Bouguereau (1825-1905)
Skilderij ‘Eros en Psyche’
oktober 30, 2019
fan ûnbekend*
Dan noch de ein, Timoteüs:
no’t myn tiid hast kommen is,
hat gâns folk my sitte litten
dat foar bruorren trochgie,
sa ferrint it libben dus.
Myn bloed wurdt al ta offer stoart
sa’t ús Hear oerkommen is;
wit, de goede striid ha ’k striden,
’t leauwe wis beholden…
myn belidenis yn ’t koart.
Sa’t ik al skreau, it wie in striid:
útrûn ha ’k de wedstriidbaan,
dus fertsjinje ik de krânse
fan de Hear dy’t trochiet
foar betrouber troch de tiid.
* Yllustraasje ‘Lauwerkrânse’