november 17, 2019
fan William Turner*
Gjin minske wit hoe lang de Donau streamt
by bergen lâns dy’t heger rize
om de rom fan ’t lânskip te besjongen
fier boppe minskelûden út.
Napoleon hat fan de hichte dreamd
om oaren harren plak te wizen,
mar dy ha syn hearskippij besprongen
mei delgong by it einbeslút.
Lit rize wat al iuwenlang bestiet:
it Pantheon op Dútske hichte
om Napoleons ferlies te fieren,
de opgong nei in fûle striid.
Sjong dêrom mei elkoar ’t oerwinningsliet,
mei ynspiraasje waard it dichte:
Us Walhalla is foar sterke spieren,
de frede komt wol mei de tiid.
* William Turner (1775-1851)
Skilderij ‘De iepening fan it Walhalla’
november 16, 2019
fan ûnbekend*
Wol harkje nei de tiid
fan doe en hjoed de dei,
doe wiene it profeten
troch wa’t God kaam mei syn wurd,
mar hjoed fertel ik fan de wei
dy’t Kristus mei ús giet.
Gjin ingel lykas Hy,
dy’t trochgiet foar de Soan
fan God om heech te sitten
op ’e troan yn ’t himelryk;
as stoarmwyn fljocht in ingel oan,
mar Kristus bliuwt derby.
Hy waard oan ús gelyk,
as minske troch de dea,
hat ús net sitte litten
yn eangst foar hoe’t it komt;
in ingel middelet foar ús nea,
mar Kristus liedt nei ’t ryk.
* Fragmint út ’e brief oan de Hebreeërs