december 8, 2019
fan ûnbekend*
fan ûnbekend**
In himelwolk is goed foar rein,
ferkuollet nei in hjitte dei,
in ierdewolk knypt strôten ticht,
sa komt men oan in kweade ein.
Gjin gas as wapen yn de striid,
mar libben se dy ôfspraak nei?
Fritz Haber seach it as syn plicht
it út te finen, want de tiid…
… rûn troch, de fijân moast derút,
mei gauwens út ’e fuorgen wei,
mei gloar ferlear er alle sicht,
wat achterbleau, wie deade bút.
By Ieper waaiden wolken oan,
earst op ’e Frânsen ta, doe nei
de Kanadezen, gjin gewicht
hie ’t gas… hoefolle binne stoarn?
Swier wie it tellen, om ’e nocht,
want fuorgesifers rûnen troch
elkoar en dogge dat no noch…
wa’t achterbleau, hat noch lang socht.
* Foto ‘Gifgasoanfal’
** Foto ‘Gifgasoanfal op ’e Kanadezen’
december 7, 2019
fan ûnbekend*
Ryk en earm, se ha der altyd west,
mar seagen faak elkoar net sitten,
de rike hie gjin each foar noed,
de earme moast fan ’t wrotten switte.
Sjoch de rike mei syn gouden ring,
mar sjoch him dan net nei de eagen,
wurd net ferbline troch de gloed
fan pracht en priel, dy’t earmen pleaget.
Sjoch de earme yn syn skurve klean,
lit him net nêst de fuotbank sitte,
troch ’t wrotten docht er mear as goed,
men moat him yn syn wearde litte.
Riken sille op ’en doer fergean
as sljochte blomkes yn de finne,
sy reitsje earder al yn noed
troch ’t skroeien fan de gleone sinne.
* Ikoan ‘Jakobus’