december 14, 2019
fan ûnbekend*
Wol harkje, bruorren, nei de tonge,
fan it hiele lichem is er lyts,
hy kin ferflokke, mar ek sjonge.
In hynder kin men maklik stjoere
mei de leie, yn de bek in team,
hy lûkt de karre mannich oere.
In skip, hoe grut ek op ’e weagen,
kin men stjoere mei it lytse roer,
de stjoerman hat de koers foar eagen.
It fjoer kin as in flam begjinne,
wreidet him yn de omjouwing út
en sil it fan de beammen winne.
De tonge kin in oar ferflokke,
ek al is er yn it lichem lyts,
dochs makket er faak rare brokken.
* Foto ‘Fjurrige tonge’
december 13, 2019
fan Tadolini Adamo*
Gjin kreazer knaap as Ganimedes,
soan fan Trojes stichter, Tros,
as hoeder fan de heit syn fee
kaam him syn hâlding goed fan pas.
God Zeus hold him ek yn de gaten,
kreazer knaap hie hy net sjoen,
hy woe mei him wol graach yn see,
wie net oan syn goadinnen bûn.
Hy rôp in earn nei de Olympus,
stjoerde mei in opdracht him
nei Ganimedes, hoedzjend fee,
in twirre holp him by de klim.
De jonge mocht de wyn ynskinke
foar god Zeus, dy’t op him dronk:
‘Myn feintsje, tsjoch, do bist grif ree
om hjir te bliuwen… yn de pronk.
Foar Zeus gie ’t net om inkeld praten,
want syn praat wie wol sa glêd
om mei de ynskinkknaap yn see,
úteinlik rekken se op bêd.
Zeus stjoerde Hermes mei twa merjes
by de berch del nei de heit,
dy’t siet te treurjen by it fee…
De skieding wie in skrinend feit.
* Tadolini Adamo (1789-1868)
Byld ‘Ganimedes en de earn’