januari 23, 2020
fan Lovis Corinth*
Wat is der moaier as
om ljocht te heinen
wylst de kapper, bern oan hûs,
beheint it weagjend hier
ta wat har komt fan pas.
Sy hat it yn de hân
om moai te wêzen
yn en bûten harren hûs,
it makket him ek blier,
sa bliuwt de bân yn stân.
Hy leit it foar har fêst
op doek, ’t folsleine
byld, want ferve by de rûs,
gjin ûnderdiel wurdt skier,
’t gehiel is op syn bêst.
Sy ynspirearret ta
in moaier wêzen
fan harsels en ek syn byld,
gjin wêzen is gelyk,
dat is no ienkear sa.
Wat is der moaier as
’t ferskil te heinen
tusken kapper en syn byld?
Dat makket dûbel ryk:
syn frou komt him fan pas.
* Lovis Corinth (1858-1925)
Skilderij ‘Charlotte Corinth
oan har kaptafel’
januari 22, 2020
fan ûnbekend*
Wês net bang foar ’t lijen
as dat is om Kristus’ wurd
dat yn jim libben bliken docht,
it wurd dat died wurdt, sil befrije.
Wit dat Kristus’ lijen
ús befrijd hat, sadat wy
as frije minsken fierder gean
en ûnderweis de Geast noch krije.
Lit de Geast jim liede
nei de ein dy’t komme sil
mei gauwens, leafde is it ljocht
dat jimme ûnderweis ferspriede.
Wês net bang foar ’t lêste,
wa’t fertrout op Kristus’ wurd,
kin rêstich foar Gods oardiel stean,
Hy wol foar ’t lijend folk it bêste.
* Yllustraasje ‘Lijen fan Kristus’