februari 3, 2020
fan Rembrandt*
Jim binne fan de nije wrâld
mei’t jim it nijs fan Kristus kenne,
mar der is in oar ferhaal
dat falske learaars graach fertelle,
dy tradysje is al âld.
’t Ferhaal komt út ’e âlde wrâld:
it kwea fan Sodom en Gomorra,
like kwea as doe mei Noäch,
hy koe de minsken mear fertelle,
mar it liet it minskdom kâld.
De wrâld is hjoed noch fol mei kwea:
op ljochtskyndei mei braspartijen,
’t folk jout ek syn lusten bod,
de sûnden binne net te tellen,
’t fiert úteinlik nei de dea.
Nim Bileäm dy’t ûnrjocht die,
hy soe it folk fan God ferflokke,
mar syn ezel hold him tsjin,
dat stomme bist, net foar te stellen,
joech syn baas de rjochte rie.
Dus wês gjin slaaf fan it ferdjer,
mar baas om ’t goede te fertellen.
* Rembrandt (1606-1669)
Skilderij ‘Bileäm’
februari 2, 2020
fan ûnbekend*
fan ûnbekend**
Franz Jozef, noch mar achttjin jier,
waard foarst fan machtich Eastenryk,
it wie it jier fan revolúsjes,
mar de keizer woe gjin omkear ha,
hy joech wat bliuwend wie gelyk.
Elisabeth, ek Sisi neamd,
seach hy wol sitten as syn frou;
sy hie gjin inkele yllúzje
dat de keizer woe allinnich ha
in keizerinne… wie hy trou?
Franz Jozef wie trou yn syn wurk,
fan moarns betiid oant yn de nacht,
hie yn syn âlde styl fidúsje,
mar ferlear op ’t slachfjild slach nei slach,
dat Eastenryk joech ta yn macht.
It faaie libben sloech ek ta
mei moard en selsmoard en syn broer
moast ûndergean de ekskekúsje,
mar de keizer libbe troch, woe ha
foar Eastenryk in sterk bestjoer.
Franz Jozef, seisentachtich jier,
wie keizer fan ’t ferswakke ryk,
yn oarloch ek, wrâldwide rúzje,
makke net mear mei de lêste slach,
wat bliuwend wie, kriich ûngelyk.
Skilderij ‘Franz Jozef’
Foto ‘Franz Jozef’
