maart 1, 2020
fan ûnbekend*
Wat is yn ’t universum absolút?
Ik soe it net betinke kinne,
want it minskdom stiet net stil
as bliuwend byld, mar tinkt foarút,
is altyd yn relaasje.
In stien is gaadlik foar in byld, ferslyt
lykwols, kin ’t fan de tiid net winne,
mar ien stien wie sterk fan wil,
alhiel gjin tinken yn swart-wyt,
mar alles yn relaasje.
Sa rint de romte lykop mei de tiid,
ferbûcht in swiere stjer de romte;
’t universum stiet net stil,
beweging is der wiid en siid,
’t hielal is yn relaasje…
… mei Albert Einstein en syn wittenskip
fan relativiteit en faasje.
* Foto ‘Albert Einstein’
februari 29, 2020
fan ûnbekend*
De Soan fan God is kommen
om te kennen God de Heit,
Dy’t ús ivich libben jout,
sa wurdt ús Ierdsk bestean ferromme.
Mei wetter waard Er dope,
oan it krúshout siet syn bloed,
tusken beide libbe Hy
foar ús mei leafde, leauwe, hope.
Mei Kristus hat God tsjûge
fan syn leafde foar de wrâld,
elk dy’t op syn Wurd fertrout,
wurdt ta it ivich libben nûge.
* Yllustraasje ‘Doop fan Kristus’