maart 7, 2020
fan Jusepe Leonardo*
Bêste Gajus,
Myn winsk foar dy is sûnens
nei lichem en nei geast,
oer alle boegen fan ’t bestean
meisto it goede ûnderfine,
sa silst moedich fierder gean.
Fan bruorren ha ’k fernommen
datst libbest út ’e wierheid wei,
sa litst dyn ljocht klear skine
foar wurge reizgers ûnderweis
om Kristus’ boadskip oer te bringen,
do joust har gastfrij ûnderdak
en bist net as Diótrefes,
fan him krijt nimmen plak,
hiel oars as by Demétrius,
dy hâldt him oan de goede dingen.
Groetnis, Gajus, ek oan oaren,
wy prate nochris op in goede dei.
* Jusepe Leonardo (1601-1652)
Skilderij ‘Tredde brief fan Jehannes’
maart 6, 2020
fan Giuseppe Maria Crespi*
As keningsdochter koe sy ’t roaie,
ek as mem fan fyftich bern
fan Agamemnon, Grykske held,
har eigen Troje gie ferlern.
Op ’t alter stoar har eigen dochter,
om’t allinnich gloarje telt,
in nederlaach wol men net sjen…
ferjilding foar in Grykske held.
Har soan, as boade mei de skatten
fan stêd Troje, waard in lyk,
dat weiwaard yn de Swarte See,
wêr wie syn heit, in wiere Gryk?
Syn mem naam wraak op beide soannen
fan de moardner fan har soan,
ûntnaam dy foarst it sinneljocht,
it bloed rûn fan de keningstroan.
Mar wraak moat ek wer wreke wurde,
’t iene is oan ’t oare bûn,
is ’t net in held, dan is ’t in bist,
de mem feroare yn in hûn.
* Giuseppe Maria Crespi (1665-1747)
Skilderij ‘Hekabe makket Polymestor blyn’
