februari 11, 2020
fan Getty*
Mei Kristus binne wy ferbûn,
Hy nimt it foar ús op
wannear’t wy skuldich steane
foar God de Heit oer,
sa wurdt ús skuld ferjûn.
Jim binne op ’e hichte fan
it wurd, in âld gebod,
dêr’t kristenen foar geane;
ha foar dyn broer oer
de leafde, twa yn ’t span.
De leafde jildt foar elkenien,
foar heiten, feinten, bern
dy’t foar elkoar ynsteane;
wy sille bliuwe
yn ivichheid as ien.
* Yllustraasje ‘Leafde’
februari 10, 2020
Tusken wolk en himelsblau
is de bôge yn syn elemint,
in knypeach fan de sinne,
wylst it grien in glimke krijt,
gjin pylk oan hichte wint.
Tusken wittenskip en himelsk lûd
bin ik oan twivel wend,
om beide kin ’k net hinne;
ljocht dat brekt, hat ús fernijd
dat alles wurdt bekend.
Earder joech in delgeand lûd hâldfêst,
dat tenei gjin floed it wint
fan wolkeloft en sinne,
dat is wat de bôge seit,
mar wêr’t it hinne rint…
… mei it klimaat? De twivel jout gjin rêst.