februari 23, 2020
fan ûnbekend*
De kriich is wier, ja stjerrend wier,
de earste fan de hiele wrâld
op lân, op see en yn de loft
mei foar it earst ek pânsertanks,
de skotten klinke withoefier.
It hobbelhynder ropt: ‘Dada,
ik bin noch jong en net fan sâlt
en wrinzgje dat de keunstwrâld ploft
troch foar it earst in waansin-show,
de poaten klapperje: haha.
De kriich is oer, de wrâlddo koert,
mar Jan Soldaat wie noch net âld,
foar syn gefoel it koartste skoft,
it langste wie foar him te fier,
it skot klonk lûd en dronk syn bloed.
It hobbelhynder ropt: ‘Dada,
farwol, myn hjitte wurdt no kâld,
de eigen hobbel is ûntploft,
de show is oer, de keunst giet troch,
de ein fan ’t wrinzgjen is blabla.
* Yllustraasje ‘It Dadaïsme yn byld’
februari 22, 2020
fan Frans Floris*
De leafde komt fan God
en elk dy’t leafhat, is syn bern
dat mei de Heit ferbûn is,
lykas Kristus as syn Soan,
sa giet de leafde nea ferlern.
Ha yn jim libben leaf
as broers dy’t foar elkoar bestean,
om’t jim de leafde jûn is
troch de Hear, oan ’t krús ferstoarn,
Hy hat ús sels syn libben bean.
Fan Kaïn ha wy neat,
om’t hy in bern wie fan it kwea;
de moard op syn broer Abel
sleat net by de leafde oan,
mar rûn mei haat op nei de dea.
Dat leafde wint fan haat
komt troch de leafde fan de Hear:
sjaloom yn plak fan Babel.
* Frans Floris (1516-1570)
Skilderij ‘Kaïn en Abel’
