maart 23, 2020
Dêr stiet er heech en dreech,
de swarte fûgel fan de dea,
syn snaffel stekt er fier foarút,
de wjukken binne al wer drûch,
mar wat er opdûkt hat, bringt skea.
’t Is net de glêde iel
dy’t troch syn strôte gliden is,
hy liet dat bist der net wer út;
de iel hie fretten út ’e drek,
sadwaande gie it dêrnei mis.
It gie fan drek nei iel
en fierder nei de ielgoes ta,
dy’t oerbrocht wat er opdien hie,
klapwjukjend nei ferkear en kroech,
gjinien woe sa it firus ha.
Dêr stiet er heech en dreech,
de fûgel dy’t de swarte dea
foar eagen bringt, de pest dy’t gie
de wrâld oer, nea rûn it sa gek
as doe… mar wat wol sizze nea?
maart 22, 2020
fan ûnbekend*
De fraach wie net oft sy goed prate koe,
mar kin in frou wol kieze
as it giet om ’t lânsbelang?
Amearika mocht net ferlieze.
Jeannette Ranking kaam yn it Kongres
as earste frou dy’t prate
mocht mei noaten op har sang…
om ’t fredeskoeren waard sy hate.
As pasifiste wie sy tsjin de kriich:
Amearika moast wizer
wêze, net dat sy deadsbang
wie: oarloch makke ’t libben grizer.
Jeannette Ranking hie de slach ferlern:
Amearika woe stride,
’t gie foaral om ’t lânsbelang
en fierder om de heale ierde.
De fraach wie net oft sy net stride koe,
sy focht foar ’t bernelibben,
dat it rûn fan koart nei lang,
foar mem en bern hat sy lang stribbe.
Jeannette Ranking focht foar Luther King
as haad fan in brigade
fan fiiftûzen yn in mars
foar him, ien fan har fredespaden.
* Foto ‘Jeannette Ranking’