april 11, 2020
fan ûnbekend*
Lit de sechde kandler wêze
foar it folk fan Filadelfia
en de sechde stjer syn ingel,
sy moatte dyn brief lêze:
De doar stiet foar dy iepen,
omdat ik dyn wurken ken
as trouwe tsjinstfeint yn myn namme,
watsto dochst, giet net ferlern.
Lju dy’t by satan hearre,
komme ligend nei dy ta,
sy jouwe harren út foar Joaden,
moatte neat fan ’t leauwe ha.
Der komme swiere tiden
fan besikings op dy ta,
hâld altyd fêst oan myn geboaden,
dan silsto de krânse ha.
Do stiest fêst yn de timpel
as in pylder foar altyd,
do tsjinstfeint mei myn skreaune namme
krigest fan dyn trou gjin spyt.
* Foto ‘Ruïne fan in tsjerke yn Filadelfia’
april 10, 2020
fan Ferdinand Keller*
Leandros wenne oan de Hellespont,
in wetter inkeld oer te kommen
foar wa’t de slach te pakken hie,
hy is de stream oer swommen.
Hy die ’t foar Hero oan de oare kant,
in prysteres, ta faam ferplichte;
Leandros, dy’t fereale wie,
seach Hero yn de hichte.
Sy stiek foar ’t finster yn de toer in ljocht
oan om oan him it paad te wizen;
it koe allinnich yn de nacht,
deis soed er it ferlieze.
It ljocht ferlear it yn in swiere stoarm,
Leandros koe de slach net pakke;
wylst Hero stie dy nacht op wacht,
is hy derûnder sakke.
Sy wie noch prysteres, mar net mear faam,
troch wanhoop is sy ek omkommen.
* Ferdinand Keller (1842-1922)
Skilderij ‘Hero fynt Leandros’