juni 5, 2020
fan John William Waterhouse*
It wiene twalingbroers,
de soannen fan heit Nix, de Nacht,
dus wurken sy yn ’t tsjuster,
leine mei de sliep op koers.
De Sliep wie Hypnos’ saak,
hy joech him mei syn soannen del
by ’t streamen fan de Lethe
mei de dream as Morpheus’ taak.
Foar Thanatos de Dea,
de grutte broer fan ’t broerke Sliep,
sy wurkje yn it tsjuster
foar it folk mei plat de lea.
* John William Waterhouse (1849-1917)
Skilderij ‘Hypnos en Thanatos’
juni 4, 2020
fan James Ensor*
It kin net sûnder hannen
dy’t lûke foar de gong
nei wêr’t men wêze wol,
beweging sûnder sprong.
It kin net sûnder riemen,
ien stjoer, de oare bak,
sa bliuwt de boat op koers
en komt op ’t krekte plak.
Sjedêr de man mei hannen
dy’t lûke oan ien riem,
beweging sûnder doel,
hy komt sa yn de kriem.
It draaien yn de rûnte
is stilstean yn ’t bestean,
al skuort men der ek oan,
gjin koers nei kym noch kearn.
* James Ensor (1860-1949)
Skilderij ‘De roeier’