mei 18, 2020
Dêr leit er achter oare boaten,
dy’t foar ’t each noch farre kinne
mei de wenskipskipper oan it roer;
hy nimt wat foaroan leit,
lykas hy wend is, yn de mûle:
‘Dy boat giet nei de kloaten!’
Gjin wintersliep, hy leit te sliepen
sûnt de skipper him derhinne
lei, wylst hy de útspraak die: ‘’t Is oer,
do hast dyn oeren draaid,
no net mear oer ’t ferline lulle,
brek my de bek net iepen!’
Dus sa… it moat dochs net healwizer
nei syn plicht, faak mei de sinne
oan de loft, hoewol’t er ek wol foer
yn waar en wyn, in feit
is dat syn baas hat in bedoeling:
op koers nei it âldizer.
mei 17, 2020
fan ûnbekend*
fan ûnbekend**
As fjirde fan wol tolve bern
wist Ernest wat fan ’t grutte ôf,
grut wie ek syn aspiraasje
om nei ’t middelpunt te gean
fan wat mei ’t each net is te sjen.
As wittenskipper woed er ha
’t atoom hie grif syn eigen bou
mei kearn en elektroanen;
’t koe foar lytse ienheid stean,
mar Ernest woe op splitsing ta.
’t Atoom fan stikstof wie geskikt
om op te sjitten, wol yn ’t lyts,
hiel sekuer mei alfadieltsjes,
dat sa splitste hy de kearn
en wie it earste doel berikt.
It lytse frege daliks om
noch mear te witten, dan yn ’t grut,
want soks folget út ’e dieltsjes:
twa kear splitsten se de kearn
en beide kearen foel de bom.
* Foto ‘Ernest Rutherford’
** Foto ‘Atoombom op Hiroshima’
