Willem Tjerkstra’s thússide
admin

Bylden nei de dea

Keunst

fan ûnbekende namme*

Elk hat in byld fan nei de dea:
fan opstean foar de ivichheid,
in ljocht bestean of stean yn ’t fjoer
of ’t lichem wurdt ta stof of jiske,
úteinlik bliuwt der neat fan oer.

Sjoch Petrus mei de himelkaai,
dêr’t hy de doar mei iependocht
foar minsken dy’t dan fierder gean
nei Kristus mei syn iepen earmen
en hilligen yn kreaze klean.

Sjoch hoe’t de duvels mei in swaai
de sûnders driuwe yn de hel,
dêr’t flammen brâne op ’e lea;
fan pine klinkt in kleiend kjirmjen,
de oergong nei it ljocht komt nea.

Elk hat in byld fan nei de dea,
it komt úteinlik derop del
dat nimmen wit fan heil noch skea.

* Master fan it Marijelibben
(wurke yn Keulen fan 1460-1490)

admin

Fjouwer trompetstjitten

Bibelbylden

fan ûnbekend*

De earste stjit op ’e trompet
rôp heil en fjoer op, dêr trochhinne
bloed, ’t waard op ’e ierde smiten…
in tredde part oerlibbe ’t net.

De twadde stjit rôp op in ding
lykas in berch yn ljochte lôge,
yn de weagen waard it smiten…
in tredde part oerlibbe ’t net.

In stjer foel by de tredde stjit
op wetterboarnen en rivieren;
fan it wetter waard in tredde
part aalst**, te drinken wie it net.

De fjirde stjit op ’e trompet
fertsjustere in tredde part fan
sinne, moanne en de stjerren,
de ierde waard yn ’t skimer set.

* Yllustraasje ‘Ingels’
** bitter

Archieven

Zoeken

  • Categorie

  • Datum