juli 19, 2020
fan ûnbekend*
Read fan it fergetten bloed,
it folk tsjin adel en de tsaar,
it moarnsread fan it nije.
Wyt fan ‘suver hat it west’,
’t ferline is ek goed foar hjoed,
lit ús dat oan de takomst wije.
Read tsjin wyt, in felle striid
fan generaal tsjin generaal,
dy’t beide ’t lân wol lije
meie; wyt Europa tsjin
de reade rest… in nije tiid?
De Rus lijt ûnder twa partijen.
Fan it fiere east oant west
fertelden readen ’t einferhaal,
se soene ’t bloed net mije;
Lenin skreau de wetten foar
op grûn fan ’t âlde manifest,
Marx mocht syn erfenis wol lije.
* Fotokollaazje ‘Russyske boargeroarloch’
juli 18, 2020
fan Francesco Zuccarelli*
Kadmos, keningssoan dy’t socht
Europa, troch god Zeus ûntfierd,
mar nearne wie syn sus te finen,
úteinlik hie hy skjin syn nocht.
Fan ’t orakel kriich de prins
de taak in ko te folgjen nei
in lân om dêr in stêd te stichtsjen,
dat Kadmos kaam oer mannich grins.
Offerje woe hy de ko,
in boarne soe it wetter jaan,
bewekke troch de draak fan Ares,
dy’t mei syn tosken knarste: ‘Ho!’
Krêftich sloech doe Kadmos ta
en rekke krekt de drakekop,
dat Ares liet him acht jier tsjinje,
de oarlochsgod woe ’t ek sa ha…
… dat syn dochter waard de frou
fan Kadmos, dat Harmonia
waard lokkich mei har man en Thebe,
de kowestêd, krekt nij fan bou.
* Francesco Zuccarelli (1702-1788)
Skilderij ‘Kadmos deadet de draak’
