juli 12, 2020
fan ûnbekend*
fan ûnbekend**
Wol tûzen dea yn ien kertier,
deunby de Gouden Timpel
fan Amritsar, ’t koe net minder,
dat it skreaude withoefier.
It fjoer kaam út in Britsk gewear,
geweld as bluodrich stimpel
op Britsk-Ynje… harkje, blinder,
kom net by de timpel gear.
It folk gie foar it eigen lân
nei ’t park tichtby de timpel
om ’t Baisakhi-feest te fieren,
wat massaal rûn út ’e hân.
Der wie doe gjin ûntkommen oan,
de Brit fûn it mar simpel
om de boaiem read te sieren,
hy siet hearskjend op ’e troan.
Mar sûnder of mei tsjingeweld
set ek it folk syn stimpel
op it eigen lân, mei minder
kin it net, de frijheid telt.
* Yllustraasje ‘Moardpartij yn Amritsar’
** Monumint ‘Jallianwale Bagh’
juli 11, 2020
fan Saint-Sever Beatus*
It fisioen liet skine
syn ljocht klear op ’e timpel,
dêr’t de doar fan iepengie;
sân ingels kamen foar it ljocht
yn blinkend linnen
en om de mul in gouden riem,
sa’t ingels strielje kinne;
oanrikt waarden gouden skalen,
sân, foar elke ingel ien,
in teken fan Gods grime,
dy’t my klear foar eagen
kaam, de reek as teken
fan Gods hearlikheid en macht
gie troch de timpel yn sân walen,
mar gjin minske mocht deryn…
earst kamen de sân pleagen.
* Saint-Sever Beatus (alfde iuw)
Yllustraasje ‘Sân ingels’