juli 20, 2020
De wiisheid, beitele yn stien,
sprekt iepen sielen oan
mei wurden dy’t djip reitsje
om sa steviger te stean.
No sit er, mar earst hat er stien,
noch wankel yn de moarn,
want soe er it wol meitsje
om mei wiisheid foar te gean?
Hy slacht net op foar Socrates,
de master op it plein
dy’t freegjend wiisheid learde
oant er dronk it dwaze gif.
De dei troch jout er trou syn les,
dêrmei is it net sein,
want doe’t de tiid rap kearde,
rekke earst syn stânplak wif.
Sjedêr, de wiisheid hongen oan
de muorre, jout no sicht
op hoe’t de wrâld leit oan de
fuotten fan wa’t iepen stiet.
juli 19, 2020
fan ûnbekend*
Read fan it fergetten bloed,
it folk tsjin adel en de tsaar,
it moarnsread fan it nije.
Wyt fan ‘suver hat it west’,
’t ferline is ek goed foar hjoed,
lit ús dat oan de takomst wije.
Read tsjin wyt, in felle striid
fan generaal tsjin generaal,
dy’t beide ’t lân wol lije
meie; wyt Europa tsjin
de reade rest… in nije tiid?
De Rus lijt ûnder twa partijen.
Fan it fiere east oant west
fertelden readen ’t einferhaal,
se soene ’t bloed net mije;
Lenin skreau de wetten foar
op grûn fan ’t âlde manifest,
Marx mocht syn erfenis wol lije.
* Fotokollaazje ‘Russyske boargeroarloch’