juli 26, 2020
fan ûnbekend*
Gjin keizer mear yn ’t keizerryk,
de oarloch hat him ’t lân útjage,
gaos is oan it regear,
de frede freget om replyk,
der binne minstens tûzen fragen.
De frede freget kapitaal
en grûngebiet, it is oerfrege
foar it lân; it hat net mear
as skuldgefoel, in tryst ferhaal:
de eigen ear wurdt djip ferlege.
Dochs wurdt de grûn foar ’t nije lein:
de grûnwet om út neat te skeppen,
’t ferline nimt in kear,
mar ’t âlde is net djip ferslein,
de gaos sil noch jierren meppe.
En út dy gaos komt it ryk
dat swakken nei de kampen jaget:
Adolf Hitler oan ’t regear.
* Foto ‘Oarlochsynvalide yn Berlyn’
juli 25, 2020
fan ûnbekend*
It is sawat safier
dat Babylon yn fjoer en flam
fergiet, gjin stien bliuwt op ’e oare,
ferlern is al har sier.
De foarsten stean dan fier
fan Babylon nei ’t fjoer te sjen
en sille lûd oer ’t needlot kleie,
ferlern is har fertier.
De keaplju yn it spier
mei harren hannel foar de stêd,
sy krite kleiend oer ferliezen,
de takomst eaget skier.
De seelju dy’t elk jier
de fracht ferfarre, bliuwe stean
en struie strjitstof op ’e holle,
wa jout noch om plezier?
Mar ’t godsfolk sil net stean
te kleien, fier klinkt it jûchhei,
oer Babylon is ’t oardiel sprutsen,
har heechmoed sil fergean.
* Yllustraasje ‘Klacht om Babylon’