augustus 17, 2020
It joech gjin lúkse rekreaasje,
want it hûs wie noch fan hout,
dochs waard it yn korona-tiid
de wiken troch ferhierd,
mar hoe’t it mei de fentilaasje siet?
Deis wie der wol ferdivedaasje
bûtendoar, dêr’t soele wyn
de hûd noch wat ferkuolling joech
en oars it koele wiet,
mar hoe’t it yn de lette oeren siet?
De hjitte joech dan yrritaasje,
want it sitten liet it swit
al rinne, lizzend bleau men ek
net drûch, lykas soks giet
wannear’t korona noch in kânske biedt.
De kâns foar sljochte rekreaasje
mei in handoek en in kleed
joech kreativiteit… net gek!
augustus 16, 2020
fan ûnbekend*
Lit ús op it libben drinke,
lit ús drinke op ’e dea,
der is neat tsjin op fleurich wurde,
freugde docht gjin minske kwea,
elk wurdt betsjinne op syn winken.
Lit ús tinke oan it libben,
ek in bytsje oan de dea,
dy’t wol wat hat mei dronken wurde,
alkohol lûkt troch de lea,
fersloppet wêr’t men earst nei stribbe.
Lit ús leare fan de Steaten,
dy’t feriene wiene tsjin
de alkohol om drûch te wurden,
mei it each op grut gewin,
mar wit dat drinkers fierder geaten.
Lit ús net nei oaren wize:
drinkers of wa’t bliuwe drûch,
want elk wurdt op syn wize wizer
yn de keamer of de kroech…
lit alle geasten fleurich rize.
* Foto ‘Alkohol wurdt ferballe’