oktober 29, 2020
fan Willem Danielsz. van Tetrode*
fan Hendrick Goltzius**
Hjir stean ik dan stânfêstich,
wiidút beide skonken, rjocht
de rjochterearm mei knots,
de linker bûgd nei achteren,
fêst stean ik as in rots.
Ik hâld my no noch rêstich
foar’t ik yn de rûnte slaan
om tolve taken út
te fieren, kom mar op, ik bin
der klear foar om te jaan…
… de klap, foar my net lêstich,
want ik bin op sterkte boud
mei spieren yn de lea
fan foaren en fan achteren,
wat my de slachkrêft jout.
Hjir stean ik justjes wankel,
mei de tolve taken klear,
ik ha de put derút,
it sicht is no fan achteren,
it lichem docht my sear.
* Willem Danielsz. van Tetrode (sirka 1525-1580)
Byld ‘Herkules Pomarius’
** Hendrick Goltzius (1558-1617)
Gravuere ‘Herkules Farnese’
oktober 28, 2020
fan ûnbekend*
Wat wolle wiere wurden oars
as om my ynmoed nei te hearren?
Wizen harkje yn Gods hûs,
mar offers fan de dwazen
binne al yn ’t foar mislearre.
De mûle praat foarby de noas
der samar rappe wurden hinne,
’t binne lûden by de rûs
as dreamen nei de drokte,
nimmen sil der wat by winne.
Kom dyn belofte altyd nei,
dan hâldst foar God oer in gewisse
dat wol sprekken lije kin,
as wurden dieden wurde,
sil de sprekker ’t doel net misse.
* Yllustraasje ‘Ien wurd mei twa hannen’