oktober 31, 2020
fan ûnbekend*
Wa’t wurket, yt mei smaak it brea
en swiet is elke nacht syn sliep,
dan komt er útrêst wer fan ’t bêd;
wa’t ryk is, kin net sliepe,
want hy yt him mear as sêd.
De rykdom wurdt foar him in flok
dy’t hinget oan syn kapitaal,
hy wurdt nea sêd fan al dat jild,
syn mûle stiet wiid iepen
oant er him op ’t lêst fertilt.
Dat wurdt foar him syn ûngelok,
it kapitaal giet sa ferlern
as wie in part fan him ferstoarn;
de takomst eaget sletten
foar himsels en foar syn soan.
Wa’t hinget oan syn jild, lijt skea,
syn fal is djip, út is ’t ferhaal.
Yllustraasje ‘Rykdom’
oktober 30, 2020
fan Athanadoros, Hagesandros en Polydoros*
Yn Troje wie hy pryster,
Laokoön, fan twa jonges heit,
hy hie it net op ’t houten hynder stean
en liet dat de Trojanen witte,
stiek troch ’t hout… syn dea wie tryster.
It hynder fan de Griken
wie in list, foar Troje wie ’t in feit
dat yn de stêd de fijân kaam te stean,
wat Laokoön earder witte
liet, dat syn gelyk die bliken.
Wat jout it om gelyk te
krijen as twa slangen knipe ta,
sadat de heit en syn twa soannen nei
de siken gapje, dy’t it sitte
litte, stjerre sûnder sykte.
Wat wie de rol fan goaden
by de ramp fan Troje en de dea
fan Laokoön en syn soannen, mei
dy fraach bliuwt elke tinker sitten…
hawwe sy fan ’t minskdom holden?
* Athanadoros, Hagesandros en Polydoros
Byldegroep ‘Laokoön en syn soannen’
