januari 4, 2021
It is der net fan kommen,
’t fjoerwurk fan de Aldjiersnacht
hie neat ferlike mei de jierren
doe’t er folle jonger wie,
klapwjukjend seach er dat fan fierren.
Noch ien kear soks belibje,
hie syn winsk west foar de nacht
dat hy oant yn de geast ferklomme
en it lichem ek gjin rie
wist om wer by de tiid te kommen.
No stiet er foar de lêste
kear by ’t ljocht fan ’t âlde jier,
dat spegeljend noch hat te sizzen
wat him hjoed te wachtsjen stiet:
do komst no ienkear ek te lizzen.
januari 3, 2021
fan ûnbekend*
De sike man fan hiel Europa
wie Turkije mei syn sultan
troch al dy iuwen hinne,
moslim wol, mar wrâldsk tiran,
hy liet it deasiik rinne.
It Ottomaanske ryk wie krompen,
buorlju hiene fan him iten
mei fûsten om te winnen,
’t sike mantsje stie te sjen,
koe net oer grinzen rinne.
Mustafa Kemal waard doe lieder
fan Turkije, wrâldske sultan,
gjinien koe om him hinne:
moslim mei ’t moderne plan,
de sike koe wer rinne.
* Ruterbyld ‘Mustafa Kemal’
