februari 6, 2021
fan ûnbekend*
Draai dy om, draai dy om,
do dûnsest as Salomo’s dochter,
sierlik is dyn stap, prinsesse,
draai mei dyn heupen, as juwielen
kamen se út keunstners hannen,
by dyn dûns bliuw ik net nochter,
want dyn nâle is in rûne romer,
altyd fol mei krûdige wyn,
dyn liif is blank as weet
mei leeljes dêr omhinne,
as in miel om jûn te dielen,
dyn boarsten binne as in twilling,
jongen fan in gazelle,
dyn hals is as in toer fan ivoar,
dyn eagen glânzje as fivers,
fieden troch in djippe welle,
dyn noas is as in berchkaam,
dêr’t dyn holle boppe útstekt,
dyn hier liket op poarper…
draai dy om, draai dy om,
do Salomo’s sierlike dochter,
dy’t de kening fangt yn dyn frissels.
* Foto ‘Dûnsjende frou’
februari 5, 2021
fan Peter Paul Rubens*
Se wiene earm en al op jierren,
hiene altyd wenne yn de hut,
dêr’t elkenien foarbyrûn,
se seagen inkeld lju fan fierren.
De goaden woene wolris witte
hoe gastfrij it folk op ierde wie,
dus reizgen Zeus en Hermes
de wrâld oer om soks op te mjitten.
It wolkom koe gjin sprekken lije
foar de gasten yn gewoane klean,
de doarren bleauwen sletten,
foar har wie hap noch slok te krijen.
De hutsdoar kaam lykwols wol iepen,
Baukis en Philemon joegen wat
se ek mar misse koene,
de goaden bleauwen ek te sliepen.
In sûndfloed spielde oer de ierde,
alle wenten waarden wei,
de hut bleau boppe wetter,
die tsjinst as timpel troch de tiden.
* Peter Paul Rubens (1577-1640)
Skilderij ‘Zeus en Hermes by
Philemon en Baukis’