februari 8, 2021
Wêr’t yn ’t ferline swommen waard
troch minsken, mar ek rotten,
dy’t beide sochten harren heil
yn itselde koele wetter,
hearsket hjoed it grize waar.
De rotten mei har eigen aard
fan hjir en dêr te migen,
ferspraten sa de kwaal fan Weil,
dat ien minske waard net better…
hearsket hjoed ek noch gefaar?
Wa sjocht it iis net as syn maat?
Al krijt men kâlde fuotten,
it nocht stiet op it heechste peil;
nettsjinsteande ûndjip wetter,
wurdt men dêrfan iiskâld raar.
februari 7, 2021
fan ûnbekend*
As dûmnyssoan wie hy bekend
mei libje tusken goed en kwea,
’t ferskil fan blank en swart,
fan wrâldoarloch nei frede…
wat bestean bliuwt, wit men nea.
Hy wie oan wittenskippen wend,
dochs gie er yn de polityk,
om’t dêr it measte bart,
foarop moat stean de rede,
mar ’t bestean is ûngelyk.
De skieding tusken blank en swart
liet hy bestean op grûn fan wat
syn wittenskip him sei,
mar wie dat nei de rede,
dy’t neat ha moast fan it lot?
Hy hie neat mei it kriichsgeweld,
mar wat wie goed en wat wie wiis?
It wie him yn de wei
dy oarloch… foar de frede,
fan Nobel kriich hy de priis.
* Foto ‘Thomas Woodrow Wilson,
presidint fan de Feriene Steaten’