februari 7, 2021
fan ûnbekend*
As dûmnyssoan wie hy bekend
mei libje tusken goed en kwea,
’t ferskil fan blank en swart,
fan wrâldoarloch nei frede…
wat bestean bliuwt, wit men nea.
Hy wie oan wittenskippen wend,
dochs gie er yn de polityk,
om’t dêr it measte bart,
foarop moat stean de rede,
mar ’t bestean is ûngelyk.
De skieding tusken blank en swart
liet hy bestean op grûn fan wat
syn wittenskip him sei,
mar wie dat nei de rede,
dy’t neat ha moast fan it lot?
Hy hie neat mei it kriichsgeweld,
mar wat wie goed en wat wie wiis?
It wie him yn de wei
dy oarloch… foar de frede,
fan Nobel kriich hy de priis.
* Foto ‘Thomas Woodrow Wilson,
presidint fan de Feriene Steaten’
februari 6, 2021
fan ûnbekend*
Draai dy om, draai dy om,
do dûnsest as Salomo’s dochter,
sierlik is dyn stap, prinsesse,
draai mei dyn heupen, as juwielen
kamen se út keunstners hannen,
by dyn dûns bliuw ik net nochter,
want dyn nâle is in rûne romer,
altyd fol mei krûdige wyn,
dyn liif is blank as weet
mei leeljes dêr omhinne,
as in miel om jûn te dielen,
dyn boarsten binne as in twilling,
jongen fan in gazelle,
dyn hals is as in toer fan ivoar,
dyn eagen glânzje as fivers,
fieden troch in djippe welle,
dyn noas is as in berchkaam,
dêr’t dyn holle boppe útstekt,
dyn hier liket op poarper…
draai dy om, draai dy om,
do Salomo’s sierlike dochter,
dy’t de kening fangt yn dyn frissels.
* Foto ‘Dûnsjende frou’