februari 20, 2021
fan James Tissot*
Jesaja’s namme sprekt fan heil,
in lokkich libben dat de Heare jout
oan wa’t him fan it kweade keart
nei ’t wurd, de minske tafertroud.
Hy sprekt dat wurd as in profeet:
‘God, as alderheechste majesteit,
is troch de iuwen hinne mei
syn folk ferbûn, yn ivichheid.’
Jesaja, soan fan Amoz, heit
dy’t syn bestean fûn by de hegerein,
oan wa’t syn soan it boadskip brocht
dat klonk as: ‘Ik ha ’t jim foarsein.’
Foarsizzing fan: ‘Jim treft it kwea
sekuer as der gjin kear komt yn ’t bestean,
mar wurdt der libbe nei it wurd,
dan sil it folk yn frijheid stean.’
* James Tissot (1836-1902)
Skilderij ‘Profeet Jesaja’
februari 19, 2021
fan Guillaume Guillon-Lethière*
Fan Herakles kriich hy de pylken
op ’e bôge, dy’t er letter brûke koe,
de pylken mei in laachje gif,
geskink foar ’t fjoer dat deade hie
de sterke god, fan fûle pine wif,
mar Philoktetes wist net hoe.
Gjin pylk koe hy op Lemnos brûke
nei’t in slang syn giftosk yn it fleis set hie,
fan pine raasde hy it út;
op ’t ûnbewenne eilân koe
hy balte, rûn de wyn fan noard nei súd,
gjinien hie lêst, wat hy ek die.
Ien pylk koe Troje deadlik reitsje:
Herakles hie dy oan Philoktetes jûn,
dus kaam de razer yn de striid;
hy rekke doel, sadat de stêd
troch gif en list ferlear, mar wiid en siid
waard sein, de ear hie Troje wûn.
* Guillaume Guillon-Lethière (1760-1832)
Skilderij ‘Philoktetes op it eilân Lemnos’