februari 22, 2021
It wetter rekke stadich wei,
ferhurde ta in glêde baan,
sleat sleepboat Harmen yn,
wat alles oer de winter sei.
Foar Harmen wie dat net sa slim,
it hiele jier hie hy dêr lein,
hy wie al mei pensjoen,
de nije tiid hie ’t him foarsein.
De winter brocht in spannend spul
fan ridend folk deun by him lâns,
hy seach it oan mei nocht,
hie nea mear oan sa’n winter tocht.
Der wie gjin tinken oan teiwaar
en dat er djipper lei as oars,
hy wie no ienkear swier
fan aard, wa tinkt dan oan gefaar?
Mar doe’t it wetter boppe ’t dek
kaam, om him hinne riisden op
de bûlevaar en kaai,
doe wie ’t te let foar ‘help’ en ‘stop’.
Foar âlde Harmen wie ’t in ramp,
it hurde iis koe hy wol oer,
mar net oer oeral wiet,
sa as it soms in skip fergiet.
februari 21, 2021
fan ûnbekend*
In ryk fermidden brocht him nei
de earmoed fan ’t gewoane folk,
it wie foar Lenin dit kontrast
dat fierde nei de revolúsje,
’t kommunisme waard de nije wei.
Marx brocht him mei ‘Das Kapital’
op wei nei ’t proletariaat,
dat libbe sûnder ideaal
en hie yn nimmen mear fidúsje…
Lenin lykwols spriek in nije taal.
Gjin oergong fia ’t boargerrjocht,
dat wie foar ’t folk gjin gongber paad,
’t moast daliks trochgean, yn ien haal
de brede wei fan revolúsje
op, de tsaar waard bûten ’t sintrum brocht.
De opgong makke hy noch mei,
it stribjen om ’t gewoane folk
te heljen út ’e lege kast
om nei de folle te ferhúzjen…
nei de tredde klap wie Lenin wei.
* Foto ‘Vladimir Lenin’