maart 19, 2021
fan ûnbekend*
De tûken stekke se de hichte yn
út freugde dat se groeie kinne
yn de hjitte fan de rotswoestyn.
Mormonen kamen hjir as kolonist,
de beammen koe gjinien ûntrinne,
dy’t har witte lieten: ‘Sjoch, dit is ’t!’
De beammen hiene it oer Jozua,
de lieder mei de earms de hichte
yn: ‘Sjedêr, myn folk, hjir mar op ta!’
Dat wolkom spriek doe ek Mormonen oan,
dus ha sy dêr har wenplak stichte
mei de beam fan Jozua as kroan.
Sa rekke Jozua yn de woestyn
fan Colorado en Mojave,
mei syn wolkom, rûzjend op ’e wyn.
* Foto ‘Rotswoestyn mei Jozua-beammen’
maart 18, 2021
fan Jan Veth*
Tichtby it brein it fjoer
fan syn sigaar
as ynspiraasje
foar Jehannes,
lyts fan stal,
hy sjocht syn wrâldsje oer.
Tichtby it skriuwpapier
de rjochterhân
foar tal fan sinnen
oer Jehannes,
dy’t al sjocht:
myn fantasy is wier.
Tichtby it jonge bern
tinkt Frederik
van Eeden djip nei
oer Jehannes,
hoe’t dy sjocht
en docht wat hy al kin.
* Jan Veth (1864-1925)
Skilderij ‘Frederik van Eeden
oan syn skriuwtafel’