juni 18, 2021
fan André Corneille Lens*
Regulus, Romein fan striid en wurd,
fan winne en ferlieze,
ek syn libben yn in spikertonne;
yn Kartago kaam er yn de sel,
dêr koed er foar it libben kieze.
Stridend tsjin Kartago wûn er slach
nei slach, mar net de frede,
op it lêst soe hy de striid ferlieze,
ek syn frijheid yn Kartago’s sel,
dêr koed er kieze mei twa eden.
Mei eed ien ûnthiet er dat yn plak
fan him in tal Romeinen
kaam telâne yn Kartago’s sellen;
slagge ’t net, dan gong er sels werom
en seach er nea wer Romes pleinen.
Oan eed twa ferbûn er trou de died:
hy waard de sel yn smiten,
kaam telâne yn in spikertonne;
Regulus, Romein fan striid en wurd,
koe nimmen syn ferlies ferwite.
* André Corneille Lens (1739-1822)
Skilderij ‘Regulus giet werom nei Kartago’
juni 17, 2021
fan Vasili Andrejevitsj Tropinin*
Ik wit krekt wat it is:
net baas oer ’t eigen liif
te wêzen, foar in oar oan ’t wurk,
dei út dei yn foar ’t deistich brea,
foar ’t bestean gjin wike wis.
Ik wit no wat ik mis:
de rêst, want ik ha ’t liif
foar altyd krigen foar mysels,
dei út dei yn bin ik oan ’t wurk,
wat foar ’t brea net nedich is.
Sy mist har frijheid ek,
har fingers wurde stiif
fan alle dagen op en del,
it goud is foar de hegerein,
dy’t sy pript by elke stek.
* Vasili Andrejevitsj Tropinin (1776-1857)
Skilderij ‘Goudstikster’