mei 8, 2021
fan ûnbekend*
It ferset tsjin Gods bestjoer
is as in festing yn de rotsen,
dy’t foargoed delhelle wurdt,
want heechmoed hat gjin doer.
Mar berch Sion stiet noch as
in hûs sa sterk en hjit de folken
wolkom foar in hearlik miel,
in kleiliet jout gjin pas…
… want de wale wurdt ferskuord
dy’t oer it antlit fan de folken
leit, dat roukleed komt derôf,
God stjoert de dea ek fuort.
Wa’t noch gûlt, hâldt dêrmei op,
de Hear sil alle triennen feie
fan ’t gesicht, de skande is
foarby, dan klinkt de rop:
‘Sjoch, dit is it wurk fan God,
nei Wa’t wy altyd útsjoen hawwe,
lit ús jubelje, wês bliid,
elk komt folslein oan bod.’
Foto ‘Feestmiel’
mei 7, 2021
fan Peter Paul Rubens*
It ynsicht kriich hy al yn ’t foar,
hy wist sa wat der barre soe,
syn krêft lei yn it witten
fan wat wichtich wie, net mei geweld
de oaren stikke litte.
In bûnsmaat wied er fan god Zeus,
dy’t hearske oer it goadedom
en focht tsjin de Titanen,
letter naam er ôfstân fan ’t geweld,
seach hoe’t de minsken kamen…
… mei offerdieren nei god Zeus,
dy’t neat fan ’t minskdom hawwe moast
en delseach op ’e ierde,
mar Prometheus waard harren held
fanwege goede dieden.
Zeus wie jaloersk en waard poerlilk,
hy bûn Prometheus rotsfêst,
doe koe in earn him pikke;
Herakles hat alle kearen teld,
liet him as maat net stikke.
* Peter Paul Rubens (1577-1640)
Skilderij ‘Prometheus yn de boeien’
