juni 20, 2021
fan ûnbekend*
fan ûnbekend**
Mobile, bouwer fan it loftskip,
dat Amundsen fan him kocht,
hie hege aspiraasjes:
mei de Norge oer de poal,
wat fan de Noar wol mocht.
Spitsbergen tsjinne as it startplak,
dêrwei gie it nei de poal,
dêr’t flaggen trije naasjes;
wa hat doe de Noardpoal kocht
of gie it om ’t idoal?
Itaalje fielde him tekoart dien,
dat Italia waard boud;
mei manlju fan ien naasje
fleach dit loftskip nei de poal,
wat útrûn op in fout…
… fan kapitein Nobile, bouwer
fan it loftskip, gjin idoal
mear fan dy iene naasje,
dy’t it noch net heger brocht
as flagje op ’e poal.
* Foto ‘Umberto Nobile’
** Foto ‘Loftskip Norge’
juni 19, 2021
fan ûnbekend*
Jesaja
Wa’t wol en wa’t net doocht,
is oan it dwaan en litten
maklik ôf te lêzen:
de dogeneat doocht net,
de ealman mei der wêze.
De dogeneat syn hert
briedt oer it dwaan en litten,
lit de earme rinne
mei honger yn de hals,
wa’t toarst hat, stjoert er hinne.
Dy smjunt betinkt in plan
om lytse lju te bringen
yn it djipste lijen,
begjinnend mei falsk praat…
wa kin syn rjocht noch krije?
De ealman is der foar
de earmen dêr te bringen
wêr’t har rjochten binne:
genôch om te bestean,
dat sy oplibje kinne.
* Yllustraasje ‘Dogeneat’