juli 4, 2021
fan ûnbekend*
fan ûnbekend**
Chang Tso Lin koe amper lêze,
gie leaver mei ’t gewear op jacht,
hie ek gjin nocht oan skriuwen,
fiskjen hie him yn de macht,
mocht graach yn Mantsjoerije wêze.
Chang Tso Lin woe dit wol witte,
wist ek wol te kommen oan
de macht en dat te bliuwen,
wat foldie de kriichshear skoan,
yn Peking hat er jierren sitten.
Tjiang Kai-Sjek mocht dat net lije,
syn stribjen wie in nasjonaal
belied, de macht ferdriuwe
fan de kriichshear, dy syn taal
mocht gjin gehoar yn Sina krije.
Tjiang Kai-Sjek woe Mao slite,
want kommunisten pasten net
by nasjonale liuwen;
Mao skreau syn eigen wet,
hat Sina op ien steapel smiten.
* Foto ‘Chang Tso Lin’
** Foto ‘Mao Zedong’
juli 3, 2021
fan ûnbekend*
Jesaja
Ferskrikkings hast foar eagen krigen:
hoe’t de fijân mei syn leger kaam,
soldaten, amtners en spionnen,
jim besit nei ’t eigen lân meinaam.
Dat rûge folk sil nea wer komme,
nea mear hearst syn taal, dyst net ferstiest,
soldaten, amtners en spionnen
giene op ’e flecht, sa’tsto earst giest.
Dus Sion, lit dyn eagen glide
oer Jeruzalem, in prachtich plak,
in tinte dy’t de tiid troch stean bliuwt,
foar it folk in feilich ûnderdak.
Foar ús is yn dat gea de Heare,
dêr’t rivieren streame, gjin galei
of steatlik skip fart nei de wâl ta,
want de tiid fan driging is foarby.
In rike bút wurdt dan ferparten,
sels de stumpers krije harren diel,
de Hear sprekt rjocht en is ús Kening,
elkenien sit fredich oan it miel.
* Foto ‘Jordaan’