juli 10, 2021
fan ûnbekend*
Der klinkt in stim, dy’t opropt: ‘Rop!’
De fraach is wat ik roppe moat,
it antwurd sprekt fan stjerren op:
‘Al it libben is as gers,
net sterker as in blomke;
as Gods azem dêroer giet,
ferdrûget alle gers,
ferwilet ek de fjildblom,
altyd klinkt itselde liet,
foar minsken ek,
sy binne as it gers,
mar it wurd fan God,
gjin sprake fan dat
dit fergiet.’
Foto ‘Ferdrûge gers’
juli 9, 2021
fan Jacques-Louis David*
De need koe wurde ta in ramp,
want Rome kampte mei ’t probleem
fan in tekoart oan fammen;
manlju hiene amper kar,
se pakten tagelyk deselde beet.
Foarst Romulus joech doe in feest
mei fammen fan it plattelân,
ek dy fan de Sabinen;
Romes manlju skeinden har,
se spilen tagelyk itselde beest.
Sabynske faam joech oan Romein
de leafde fan it plattelân,
lykas in beest waard berne
’t iene nei it oare bern,
it wie in feestlik barren sûnder ein.
Sabynske striders sloegen ta,
twa kampen fochten yn de stêd,
dêr’t froulju tusken kamen;
oarloch hie de striid ferlern,
de frede moast it fan de froulju ha.
* Jacques-Louis David (1748-1825)
Skilderij ‘Sabynske froulju tusken
de stridende partijen’
