augustus 15, 2021
fan ûnbekend*
fan ûnbekend**
De ibis wie foar him model
foar hoe’t men fljocht op eigen wjukken,
net earst op en dan wer del,
mar streekrjocht nei de einbestimming.
Earst fûn er ynstruminten út
dy’t pasten yn syn fleanmasine
foar in lange flecht: koers súd,
Australië as einbestimming.
In soloflecht mei sechtjin kear
wer nei de grûn, dus net allinnich,
mar foar him wie wol de ear
doe’t hy berikte syn bestimming.
It lei net oan syn feardichheid
dat syn masine by Florence
crashte, dat de ivichheid
hie hy te ier as einbestimming.
* Foto ‘Op rûte nei Australië’
** Foto ‘De crash by Florence’
augustus 14, 2021
fan ûnbekend*
fan ûnbekend**
Jesaja
Ik ha myn tsjinstfeint nei jim stjoerd,
sadat myn folk it sjen en hearre koe
wat Ik foar eagen ha,
’t kaam mei syn each en ear net goed.
Skuor iepen jimme eagen, sjoch,
myn tsjinstfeint is sels blyn, en harkje goed,
hy heart gjin stim of lûd,
syn kommen is dochs net omdoch?
It libben liet jim gâns wat sjen,
mar naam myn folk fan al dat sjen wat op?
Mei iepen earen ha
jim heard, mar alles gie ferlern.
Ik ha myn tsjinstfeint nei jim stjoerd,
mar ek de Wet dy’t grut en hearlik is
en myn gerjochtichheid sjen
lit… hear en doch, dan komt it goed.
* Foto ‘Sjen’
** Foto ‘Hearre’
