augustus 28, 2021
fan Hans Jordaens III*
Jesaja
Dit hat de Hear te sizzen,
Loskeaper fan folk Israel:
‘It folk fan Babel beart oer skippen,
better fiskersboaten fynt men net,
Ik lit se driuwe nei de see,
dêr binne se net mear yn tel.’
De Hear hat dit te sizzen,
de Rêder fan it slavefolk:
‘In paad ha ’k makke tusken weagen,
foar ’t Egyptysk leger wie it net,
de hynders rekken yn de see,
ferdronken yn de wetterkolk.’
Dit hat de Hear te sizzen,
de Helper fan folk Israel:
‘Hâld no net fêst oan it ferline,
bliuw net stilstean by de dei fan hjoed,
fernimme jim dan net wat komt,
in ein komt oan in âld bestel.’
De Hear hat dit te sizzen,
de Gids fan Israel, syn folk:
‘Foar jimme meitsje ik de paden
troch de wyldernis, troch de woestyn
in wei mei wetter foar de toarst,
foar jimme is it dier in tolk’:
‘De ear is foar de Heare!’
* Hans Jordaens (1590-1643)
Skilderij ‘De farao ferdrinkt yn de Reade See’
augustus 27, 2021
fan Matteo Rosselli*
Goadinnedochter Semiramis
waard ta fûnling lein yn de woestyn
en fûn troch hoeder Simmas,
dy’t har stjoerde ’t libben yn.
Sy waard de frou fan stedshaad Onnes,
troch foarst Ninos die hy him tekoart,
dy’t Semiramis sitten
seach nêst him, syn eigen skat.
Goadinnedochter Semiramis
skonk de foarst in soan, dat wie it dan,
sy seach him net mear sitten
op ’e troan, it kaam derfan…
… dat sy de macht yn hannen krige,
har soldaten oprôp ta de striid;
de folken ha it witten
dat it waard folslein har tiid.
Har tiid soe lykwols ek ferrinne
nei’t de iennichst soan kaam op ’e troan;
as do fleach sy nei heger
sfearen, dat sy is nea stoarn.
* Matteo Rosselli (1578-1650)
Skilderij ‘Semiramis’