december 12, 2021
fan ûnbekend*
De Frânsen en de Dútsers
libben lang as kat en hûn,
se klauden en se bieten,
nea hat ien foargoed de frede fûn.
De Frânsman woe in liny
mei de namme Maginot,
fersterking fan de grinzen,
dy’t gjin Dútser oerkaam… it wie ho!
It wie in ynvestearring
fan komsa, mar wolkom wie
de bloedhûn net, De Dútsers
kamen mei in strategy dy’t gie…
… troch België, wurdearring
foar de liny wie der net,
’t ferlies wie foar de Frânsen,
dat har lân waard troch de hûn beset.
* Kaartsje ‘Maginot-liny’
december 11, 2021
fan Abraham Bloemaert*
Jesaja
Dit hat de Hear te sizzen
tsjin it folk dat harkje wol
nei rjocht en dat ek docht:
‘It heil rint stadich fol.’
De frjemdling moat net sizze:
‘Fan dat folk stean ik apart,
hoewol’t ik doch ek rjocht
oan wa’t it minder hat.’
Him hat de Hear te sizzen:
‘Ast dy hâldst oan myn ferbûn,
dan krijst fan My it rjocht
te libjen like sûn.’
De eunuch moat net sizze:
‘Wat ha ik oan in dream
dy’t nea foar ’t deiljocht kaam?
Ik as útdrûge beam.’
Him hat de Hear te sizzen:
‘Bisto ree om rjocht te dwaan,
dan sil Ik dy de ear,
in earenamme jaan.’
* Abraham Bloemaert (1566-1651)
Skilderij ‘De doop fan in eunuch’
