december 24, 2021
fan ûnbekend*
Hy hat him hjir nei wenjen set,
Apollo, god fan alle hoeders;
hoede waarden sy troch him,
sadat har neat oerkomme koe
en ek net dy fan Betlehem.
Dy hoeders fielden har gerêst
doe’t hy ynienen nêst de ingel
stie dy’t spriek fan ’t hillich bern,
sadat sy rûnen nei de stâl…
Apollo woe him ek wol sjen.
Hy seach de stâl en skamme him
foar ’t eigen honk, de lúkse timpel
mei syn pylders en in dak
dat eage as in grize bol…
hy kriich as god wol syn gerak.
De hoeders lieten him doe sjen
dat sy it goede foarbyld joegen,
lykas hoeden sy de god:
Apollo knibbele mei har…
syn timpel gie foargoed op slot.
* Foto ‘Timpel fan Apollo yn Kassel’
december 23, 2021
fan ûnbekend*
Poseidon wie de heit fan Triton,
ek de hearsker oer it wide wetter;
mei syn skerpe trijetosk
stiek hy de seelju eangst oan,
fan wa’t er guon de fuotten wosk.
Mar Triton wie in fleurich fintsje,
mei in fiskesturt swom hy de see troch,
spyljend op syn skulp-trompet
om weagen del te bêdzjen,
hy hat sa mannich seeman ret.
It fintsje groeide út ta keardel,
liet ek groeie mear Tritonen,
dy’t Poseidon folgen yn
syn spoar, de iene nei de
oar blaasde lûd, wat joech mear wyn.
De skulp-trompet tsjin blaas-Tritonen,
dat de weagen rekken slim betize,
’t waard op ’t lêst in tizeboel.
* Byld ‘Triton mei fisk’