januari 7, 2022
fan ûnbekend*
Theseus,
gjin keardel hat safolle,
lykwols net genôch belibbe,
wist net dat syn ierdske heit
de kening fan Athene wie…
der waard ek sein, oan god Poseidon
fielde hy him sterk besibbe.
Theseus
kriich ier al yn de holle|
foar gjinien benaud te wêzen,
foar held Herakles ek net;
as jonkje makke hy him ree
om ’t liuwefel fûl oan te fallen,
fielde oan ’t fijanlik wêzen.
Theseus,
de fjochter tsjin de bolle
dy’t it gea ferrinnewearre
om ’t ferneamde Maraton,
dêr’t earder ek al fochten wie;
hy wûn it fan de goare bolle,
dat syn krêft waard heech wurdearre.
Theseus,
wa soe safolle wolle?
Sels de striid tsjin Minotauros,
minske mei in bollekop,
waard wûn yn Kreta’s labyrint;
Athena’s bern hat hy sa rêden…
Minotauros deade gauris.
Theseus,
de rêder fan Athene,
koe syn libben sels net rêde,
fan in rots kaam hy yn see,
as keardel wie hy dêrta ree.
Yllustraasje ‘Theseus en Minotauros’
januari 6, 2022
fan Francisco de Goya*
De boulju dy’t it fak ferstiene,
wiene mei har trijen oan it wurk,
noch oan ’t begjin fan ’t bouwurk
mei allinnich mar it houten ramt…
it barde ûnder ’t driigjend swurk.
De earste stie it alderheechste,
want hy wie it langste oan it wurk,
in man mei ûnderfining,
dy’t fan hichtefrees neat wist…
it barde ûnder ’t driigjend swurk.
Ynienen seagen se him fallen,
beide maten, oan de ein fan ’t wurk,
sy droegen him fan boppen,
wisten neat fan ’t lichemsramt…
it barde ûnder ’t driigjend swurk.
* Francisco de Goya {1746-1828)
Skilderij ‘De ferwûne boufakker’