februari 28, 2022
Foar eagen hie de Rus it byld
fan ’t brekken fan in beam dy’t broer
wie by de berte yn ’t ferline,
doe’t noch fochten waard mei swurd en skyld.
De broer kaam foar syn frijheid op
en woe yn goedens mei de Rus,
mar sûnder him wer fêst te binen
oan de machtsdriuw fan de heechste top.
Totalitêr kaam oer de macht
fan top en leger op ’e broer,
dy’t oars net koe as grinzen stelle,
mar dy naam de Rus net mear yn acht.
De broer, in beamke by de Rus,
fûn hâldfêst by in stielen stek,
dat him de útkomst net fertelle
koe… wêr bleau de stipe fan syn sus?
De Rus, alhiel totalitêr,
bedrige doe it hiele bosk,
dat alle beammen rap ferdwine
soene… mei de broer yn it ferdjer.
It rûze lykwols oer de wrâld:
‘Lang libje frijheid, ús behâld!”
februari 27, 2022
fan ûnbekend*
fan ûnbekend**
Der is noch neat feroare
sûnt de anneksaasje fan it lân
dat Hitler as fan him beskôge;
stek de fûst op tsjin tirannen,
lit se yn har leagens smoare.
Oer grinzen giet it hinne
mei it lôgjend fjoer dat stekt yn brân
de wearde fan in minskelibben;
stek de fûst op tsjin it Kremlin,
lit de krimineel net rinne.
Der is noch neat feroare
sûnt de bommerein op Rotterdam,
doe’t flammen withoeheech oplôgen;
stek de fûst op tsjin tirannen,
lit se net mei wapens score.
Oer Kiev fljocht it hinne
mei granaten, spuiend flam nei flam…
hat wearde noch in minskelibben?
Stek de fûst op tsjin de waansin,
dat de moardner falt allinne.
* Foto ‘Hitler kundiget de anneksaasje fan Eastenryk oan’
** Foto ‘Bombardemint op Rotterdam’
